史達寧省招牌第50球 傾高薪新約有計喇
20180813
東網電視
更多新聞短片
(Getty Images)
邊個話佢唔識入波先？喺世盃表現被狂插嘅曼城翼鋒史達寧，今晨喺英超大戰對阿仙奴，踢咗14分鐘就喺禁區邊射入靚波，為球隊打開紀錄之餘，亦為自己一吐烏氣。計一計數，原來呢球係呢位英格蘭國腳喺英超嘅第50球，認真有紀念價值呀！
由2015年夏天開始，史達寧過檔曼城以來，至今為球隊喺英超上陣98場，射入32球。至於之前代表利物浦則上陣95場英超，共有18球進帳。再單講上季，係史達寧大爆發進步嘅一季，上季佢全季上陣33場英超，交出18入球12助攻超強數據。
曼城本來計劃為呢位原本周薪有18萬鎊嘅中場，加薪到22萬鎊續新約，點知都畀史達寧拒絕，事關佢認為自己可以憑世盃出色表現嗌更高價，只係可惜最終事與願遺。不過，機會總係留畀有準備嘅人，邊有人估到，喺世盃零入波嘅史達寧，返嚟英超踢14分鐘就有入波，睇怕依家佢又會有足夠本錢，繼續佢之前同曼城嘅討價還價，實現佢想攞到嘅30萬鎊周薪新約啦！
東網體育同你追實體壇每個精彩時刻！