細佬使得　孫興民奪金唔使當兵

孫興民終於唔使服兵役！南韓周六晚喺亞運男足決賽，加時以2比1擊敗日本摘下金牌，全隊球員都依例免除兵役，剛剛同孫興民續約嘅英超球隊熱刺，可以鬆一口氣！

日本雖以U21小將擔綱，不過入得決賽梗係想博金牌，所以今仗作出調動，除咗派出一直坐冷板，但又日職經驗最豐富嘅中場三好康兒上陣，仲起用經常後備出場射入絕殺波嘅福將上田綺世擔任單箭頭，同強陣出擊嘅南韓鍊過。

由於「太極虎」有孫興民、黃喜燦、黃義助三大攻擊好手在陣，日本基本處於被動，問題係南韓急於贏波，埋門快而凌亂，尺寸欠佳，結果半場兩無交收。下半場56分鐘，南韓連李昇祐亦派上戰陣，擺大個頭強攻，可惜急於求成反而更亂，90分鐘以0比0結束。

加時上半場3分鐘，20歲嘅「韓國美斯」李昇祐禁區頂狂抽掛網打破僵局，隨後22歲嘅黃喜燦頭槌再下一城，雖然上田綺世喺115分鐘為日本追返一球，南韓依然贏得亞運金牌，全隊唔使當兵，呢次真係全靠兩個細佬幫手，孫興民至甩難。

今次係南韓歷史上第5次獲得亞運男足金牌，唔講唔知，其中兩次仲係並列冠軍添，嗰兩次都喺泰國發生，包括1970年曼谷亞運與緬甸共享金牌，1978年曼谷亞運就同北韓並列冠軍。因爲當時嘅亞運足球比賽，並無引入12碼決勝制度。當中1978年一屆，南北韓喺法

定時間90分鐘同加時，都無法攻破對方大門，結果南韓隊長金鎬坤及北韓隊長金鍾民一齊登上領獎台，成為一時佳話。

男足季軍戰阿聯酋同越南法定時間打和1比1，互射12碼阿聯酋贏4比3奪得銅牌。