【人物誌】西班牙搵到真9號！洛迪高摩連奴
20180909
東網電視
更多新聞短片
(Getty Images)
自從韋拿離開西班牙國家隊之後，西班牙一直缺少1位9號射手，即使迪亞高哥斯達、艾華路莫拉達踢球會幾醒都好，返到國家隊一樣冇料到。
不過，隨住安歷基成為西班牙新帥，佢同時亦為「鬥牛兵團」帶來1位9號射手洛迪高摩連奴。
現年27歲嘅洛迪高摩連奴本身係巴西人，10歲先至移民西班牙，爸爸艾達拔圖都係球員出身。艾達拔圖同1994年巴西捧世界盃嘅功臣馬仙奴一齊喺西班牙開足球學校。
因此，洛迪高摩連奴同馬仙奴2位囝囝堤亞高艾簡達拿、拉爾菲艾簡達拿自細就非常老友，洛迪高摩連奴依家更同堤亞高艾簡達拿一齊代表西班牙國家隊。
洛迪高摩連奴雖然出身足球世家，但卻被豪門忽視，巴西國家隊從未考慮徵召佢，佢加入皇馬青年軍受訓，亦好快被賣去葡超賓菲加。
不過，對洛迪高摩連奴而言，可能係好事，佢喺賓菲加獲得唔少上陣機會，68場聯賽入27球，4年前回流西甲加盟華倫西亞，上季表現更加大熟大勇，踢37場西甲入16球。
洛迪高摩連奴喺周日(9日)凌晨歐洲國家聯賽，以一傳一射幫西班牙反勝英格蘭2:1。經此一役，肯定得到安歷基歡心，有力佔據西班牙正選之位。
東網體育FB同你追實體壇每個精彩時刻！
Follow東網體育IG一齊撐本地運動員！