【港超專版】點解加盟理文?談樂軒:因為陳Sir

20180910
東網電視
更多新聞短片

理文今季季前積極增兵,銳意挑戰聯賽前列分子。從元朗加盟、27歲的中場談樂軒,便是其中一位。自16歲開始在職業球壇打滾,效力過華家堡、東方、公民、YFC澳滌、元朗的他,透露今季為何選擇轉投野心勃勃的理文:「因為陳Sir(陳曉明)返嚟教,我細個喺香港青年軍嗰陣跟佢,一直保持良好關係,加上理文今年好多嘢都比其他球會專業,所以想進一步挑戰自己。」           圖/文:陳焌鏗

在元朗度過3年光陰,對「𡃁哥」談樂軒而言,最深刻的,還是銀牌冠軍:「最難忘一定係攞銀牌,難忘得嚟係好開始又好唔開心,因為自己一直都踢足,但去到決賽就踢唔到。其實第一年踢元朗已經入到足總盃決賽,但射12碼輸咗,所以當時爭銀牌決心更大。一班人相處咗咁耐、努力咗咁耐,係一個好好嘅成果,自己決賽冇份參與覺得有啲遺憾,但都好難忘。」

目標踢入香港A隊
還記得為甚麼「𡃁哥」無法參與決賽嗎?去屆省港盃港隊重奪冠軍,談樂軒卻在次回合勇戰受傷,這次受傷更是他11年球員生涯中最嚴重的一次。回憶起當日受傷的畫面,「𡃁哥」說道:「嗰次算係我踢波生涯傷得最嚴重嘅一次,直到依家都有少少影響,但冇辦法,足球員最大嘅敵人真係傷患,都要克服。嗰下波我覺得自己唔夠狠心,如果我去晒,或者右腳未必會傷,但嗰刻好短時間要做決定,覺得會傷害到對手,咁我就收一收,反而自己整到。」

能夠重奪失落4屆的省港盃,本應是件快樂的事,但「𡃁哥」卻斯人獨憔悴:「嗰陣聽到『啪』一聲,自己真係好驚,第一時間諗起踢唔到銀牌決賽,自己都有喊,但唔係因為痛,而係冇得繼續踢省港盃同決賽。」

現時入選香港B隊的「𡃁哥」自言未滿足:「個個踢波最大目標都係幫香港隊出力,着上呢件紅色波衫係一種光榮,雖然依家只係入選到B隊,但我會繼續向A隊嘅目標奮鬥。」