細個撳檯玩雙槓　石仔返母校騷金牌

「好開心、好有歸屬感，返到嚟好似自己都變番小學生咁！」於印尼亞運歷史性衞冕男子跳馬金牌的石偉雄，周二(11日)重返母校油蔴地天主教小學（海泓道）作交流及分享。「石仔」甫出場就獲師弟妹「英雄式」夾道歡迎，台上播出「石仔」於亞運奪金精華，亦看得小學生不停尖叫！

重返舊地的「石仔」，不禁回想起於校園的難忘經歷：「最記得係小四至小五，我在走廊撳住兩張枱當雙桿咁擺，當時畀老師鬧，都唔知佢哋好嬲定好笑。嗰陣已經係港隊，每日放學都去奧海城搭小巴去旺角火車站，再到火炭體院練習，所以小息就會做功課先，如果比賽返唔到學，老師會幫手追進度，所以都想多謝所有老師同主任，無佢哋支持，我體操生涯冇咁順利。」

油天由2000年開始增設體操班，當時任教體育的楊增海老師，指原來「石仔」亦應記一功。事緣當年石媽媽於家長日向老師談起「石仔」於校外的體操成績，正值學校有意推行多元化教育，結果體操班成立後至今從無間斷。這日楊Sir亦特別現身與「石仔」話當年，現時仍於學校代課的他透露，「石仔」當時已是學界獎牌保證：「佢好好動，覺得佢好有精力，所以無論籃球、田徑、4X100米接力等都派佢比賽，有佢就好有希望！我帶隊或者睇佢比賽，就知佢好有潛質同天份，當時亦已經好捱得苦，呢個性格令佢成功。」

「石仔」多年來空閒時都會返母校探訪，超受歡迎的他這日讓師弟妹近距離接觸亞運金牌，以及接受小記者「訪問」，體操隊隊員更現場於他指導下試做「平板支撐」。小學生們全情投入，令影大合照時「石仔」完全沉浸於一片「橙海」之中，看見師弟妹們用不盡的精力，「石仔」亦笑言相信他們是未來體操界的希望，並寄語師弟妹要趁早追夢：「香港讀書同運動都緊要，但我會揀運動先，因為體操唔可以4、50歲先玩，想趁後生做自己想做的嘢先，讀書幾時都讀得番，不過都希望佢哋會運動外，都要抽時間保持學習進度。」休息約一星期後，「石仔」現已復操，惟強度仍有限，10月尾會再出發到多哈參加世錦賽，他表示屆時只希望做好自己本份，未有設下目標。

東網體育FB同你追實體壇每個精彩時刻！

http://bit.ly/2ecTF2A