一腳踏三船！電視台公審阿根廷超新星
20180915
東網電視
更多新聞短片
近日一宗峰迴路轉嘅一腳踏三船嘅感情鬧劇，令河床19歲中場艾斯基柏拉斯奧斯聲名大噪，成為阿甲身價上升得最快嘅傳奇「主角」。
呢位阿根廷小將早個星期至升任大國腳，隨軍赴美踢咗對危地馬拉、哥倫比亞嘅兩場友誼賽，被視為阿根廷未來希望，河床班主紐尼斯更準備佢份合約嘅提高買斷條款，去到1500萬歐元（約1.37億港元）咁大，以防畀人低價撬走呢個新星添。
但係呢個年少成名嘅勵志故事，又點算吸引呢？原來形象斯文嘅艾斯基柏拉斯奧斯，私底下非常Open，追緊20歲歌手兼演員Juliana Orellano嘅同時，又同25歲嘅前天氣女郎、模特兒Sol Perez發展姊弟戀，享緊齊人之福。只不過，紙係包唔住火嘅，呢件事畀Juliana知道咗，於是公開爆佢大鑊。
Juliana Orellano喺電視節目咁講：「我兩個月前見過佢幾次，與此同時我發現佢同一時間有同Sol一齊，當我發現嗰陣，我好嬲，冇人會鍾意一個鹹濕佬。」Juliana跟住仲宣布同艾斯基柏拉斯奧斯分手，費事繼續畀人當公仔咁玩。
咁究竟Juliana同Sol邊個先係介入呢段戀情嘅第三者呢？Sol上咗另一個電視節目畀人公審，至頂癮嘅一幕呢個時候出現嘞，主持人爆出艾斯基柏拉斯奧斯早喺4年前，已經同一個鄰家女孩Karen Gramajo行埋，兩人係青梅竹馬，Karen目前任職修甲師，仲Show埋佢兩個嘅合照，Sol當堂呆晒。發現原來佢同Juliana都唔係「元配」，仲要計過日子先分得出邊個係「老二」同「小三」。
據講Karen事發後都飛起「劈腿王」艾斯基柏拉斯奧斯，Sol會唔會繼續同呢個細佬喺一齊亦好成疑問，艾斯基柏拉斯奧斯正面臨「三失」。
查實艾斯基柏拉斯奧斯能夠做到咁高難度嘅一字馬──一腳踏三船，腦筋真係好掂，如果佢花多心思啲喺足球，以後絕對大把世界。
東網體育FB同你追實體壇每個精彩時刻！