法明奴受傷 周中歐聯鬥PSG點算

20180915
東網電視
更多新聞短片
(Getty Images)

周六(15日)晚英超頭場前列大戰,「1哥」利物浦持續強勢,憑住韋拿杜姆同「客場福星」羅拔圖法明奴各省1粒,作客以2比1擊敗熱刺,開季聯賽5連勝弗到震,兼為嚟緊周中歐聯主場對巴黎聖日耳門壯聲威。

季初氣勢如虹嘅利物浦,一開波即反客為主,占士米拿於右路傳中,沙迪奧文尼撞入,可惜呢位前鋒越位在先食咗鋪詐胡,之後熱刺中場艾歷迪亞回傳唔湯唔水,反而造就穆罕默德沙拿一次單刀機會。

但續替洛里斯把關嘅禾姆及時封出。但去到39分鐘,禾姆出迎打手拳失誤,畀韋拿杜姆近頂,雖然禾姆撲個波出嚟,但已過白界入球有效,紅軍終於打開紀錄。

易邊後利物浦繼續嚟料,54分鐘沙迪奧文尼於左路爆落底線橫傳,維頓漢想解圍卻差啲擺烏龍,但個波中柱彈番出嚟,禾姆回身又接唔番個波,益咗羅拔圖法明奴門前執雞射成2比0,就算拉美拿完場前追番粒,最終紅軍仍以2比1擊敗熱刺,聯賽頭5場贏晒弗到漏油。

法明奴為紅軍入波嘅23場作客賽事,取得20勝3和未輸過,絕對係客場福星,但佢受傷退下火線,嚟緊周中歐聯主場對巴黎聖日耳門,未能能否上陣。熱刺冇咗因傷缺陣嘅門神洛里斯,即刻連輸2場,防線不穩有震冇得瞓。

東網體育FB同你追實體壇每個精彩時刻!
http://bit.ly/2ecTF2A 

Follow東網體育IG一齊撐本地運動員!
http://bit.ly/2EYxoRh