一額汗 曼聯險勝屈福特2比1
20180916
東網電視
更多新聞短片
(Getty Images)
【02:24】【全場完】屈福特 1:2 曼聯
曼聯最後階段頂住屈福特瘋狂反擊，門將迪基亞於最後關頭再度作出神救，為曼聯力保1比2勝局，全取3分，屈福特4連勝走勢告一段落，開季首嚐敗績，但以今仗能力壓曼聯嘅表現來看，今季仍大有可為。
【02:20】曼聯以艾歷拜利入替路爾斯華倫西亞，補時仲有分半鐘，諗住頂埋佢，點知尼曼查馬迪累積兩面黃牌，領紅出場。
【02:17】屈福特以艾錫瑟薩斯入替卡夫卡特，改打3箭頭。
【02:11】曼聯以麥湯米尼入替阿歷斯山齊士，屈福特以阿當馬仙拿入替賀利巴斯。
【02:00】曼聯以安東尼馬迪爾入替連格，屈福特以基高費文尼亞入替真馬特。
【01:53】曼聯退守終於守唔住，安達格雷接應隊友傳中球，門前撞射破網，屈福特追成1比2接近紀錄。
【01:49】下半場開賽，天文台亦掛起8號風球，踢咗頭15分鐘，曼聯防線縮後改打穩守突擊，屈福特空群而出希望破蛋甚至追和，變成攻防戰。
【01:17】【半場完】屈福特 0:2 曼聯
曼聯表現對辦，先有門將迪基亞神救迪尼射門，前鋒線幾位攻擊手都有好表現，保羅普巴、阿歷斯山齊士都甚為賣力，終於憑近期旺到極嘅盧卡古開紀錄，再由史摩寧一腳福至心靈射門，曼聯領先2比0都算合理。
【01:07】曼聯繼續攻，一輪高波傳送，史摩寧助攻殺上對方門前心口一控，再車身窩利勁射破網世界波，曼聯領先2比0。
【01:04】終於要靠盧卡古，曼聯一輪攻勢拉散對方防線，盧卡古接應傳中球大脾撞入尾柱，曼聯領先1比0。
【01:00】山齊士變速入禁區，右路窄位勁射，被賓科士打封出。
【00:53】山齊士入波，可惜越位在先，旁證旗已舉，球證判詐胡。
【00:46】迪尼禁區內勁射，迪基亞神救力保不失，西班牙復甦，連帶迪基亞唔再膠，曼迷都安心啲。
【00:42】普巴禁區頂左路勁射，被賓科士打接實。
英超周末尾場屈福特主場迎戰曼聯，開季4連勝嘅屈福特力爭球會歷史上首次5連勝，唔會手軟，曼聯今場將會首次穿起粉紅作客球衣比賽，經過國際賽檔期回氣，應可踢出回預期水準，特別係盧卡古近況咁FIT，應該幫到手。
屈福特正選陣容(4222)
門將:26賓科士打
後衞:2真馬特 15卡夫卡特 27基斯甸卡巴些利 25賀利巴斯
中場:16杜哥利 29伊天卡普爾
中場:19韋曉士 37羅拔圖佩雷拉
前鋒:9迪尼 18安達格雷
曼聯正選陣容(433)
門將:1迪基亞
後衞:25路爾斯華倫西亞 2域陀連迪路夫 12基斯史摩寧 18艾舒利楊格
中場:6保羅普巴 27費蘭尼 31尼曼查馬迪
前鋒:14連格 9盧卡古 7阿歷斯山齊士
東網體育FB同你追實體壇每個精彩時刻！
Follow東網體育IG一齊撐本地運動員！