【西甲都打風】馬體會脫腳 施蒙尼被柴台

20180916
東網電視
更多新聞短片
(Getty Images)
香港正受超強颱風「山竹」影響,而西甲嗰邊亦受嚟緊周中開鑼嘅歐聯影響,強隊表現失常,其中馬德里體育會周六(15日)主場對伊巴,踢到補時球證開始倒數先至追和1比1,再失兩分之下,開季頭4輪已經落後榜首巴塞隆拿7分,球迷亦開始唔耐煩,向鐵血主帥施蒙尼報以噓聲。
先講歐聯對各強隊影響,除咗馬體會今輪又失兩分之外,周日凌晨(16日)亮相嘅皇家馬德里,作客畢爾包亦只能賽和1比1,同樣失兩分,至於榜首嘅巴塞隆拿雖然贏2比1,但佢哋作客皇家蘇斯達,上半場被對方攻破大門落後0比1,下半場連入兩粒先至追返,至於同樣要踢歐聯嘅華倫西亞,亦於主場0比0賽和貝迪斯,最大鑊係開季至今未嚐一勝!
講番呢段新聞嘅主題馬體會,西甲球迷最現實,打得好就畀掌聲,踢得衰就反枱,今季馬體會演出甩轆,4仗僅得1勝,而今場馬體會未有為歐聯留力,出齊基沙文、迪亞高哥斯達及高甸等主力,但就咬唔入伊巴,更於87分鐘失守落後0比1,踢到補時就嚟完場,先至憑B隊前鋒加拉斯入波扳平,免卻主場輸波厄運。
唔使輸並未能滿足主場球迷,話晒馬體會近年都係爭標份子,見球隊踢到咁都非常不滿,並向主帥施蒙尼柴台,希望佢盡快執正隊波。
東網體育FB同你追實體壇每個精彩時刻!
Follow東網體育IG一齊撐本地運動員!