【有片】等到頸長!C朗意甲激情開齋

20180917
東網電視
更多新聞短片
(Getty Images/互聯網)
終於等到喇!經過長達320分鐘、28次射門之後,今季由皇家馬德里轉投祖雲達斯嘅葡萄牙巨星C朗拿度,周日晚在意甲祖雲達斯主場迎戰薩斯索羅,取得處子入球,並且一次過起孖梅開二度,入波後嘅C朗異常激動,接受全場球迷歡呼,一切壓力都藉這兩個入球盡情釋放。
之前試過門前1碼世紀Miss嘅C朗,今仗似乎得到補償,下半場50分鐘,祖記一次攻門,薩斯索羅後衞基安費拉利門前諗住頭槌一點交畀門將干斯基,點知門將唔為意,咁就益晒企喺門前嘅C朗,畀佢門前1碼輕易射成1比0。
雖然呢個波係人都識入,但C朗仍然非常激動,好似周小龍打入袋口紅波後繞場慶祝咁興奮,全場球迷包括女友喬治娜都起身拍掌,C朗亦做出招牌慶祝動作跳起轉身落地,佢賽後接受訪問表示:「我真係好想取得處子入球,很高興能夠破門得分,這就是足球,更重要係球隊贏波。」
所謂一不離二,開齋後嘅C朗腳風大順,65分鐘憑一次快速反擊機會,C朗高速殺入左路禁區左腳射遠柱死角入網,個人梅開二度。雖然末段祖記被薩斯索羅追成1比2接近紀錄,再有杜格拉斯哥斯達向對方吐口水被罰紅牌,但祖記最終仍以2比1贏波,開季4連勝迎戰即將開鑼嘅歐聯分組賽。
東網體育FB同你追實體壇每個精彩時刻!
Follow東網體育IG一齊撐本地運動員!