【人物誌】No Look潮流先驅基拿甸奴掛靴了
20180922
東網電視
更多新聞短片
(Getty Images)
近期球壇興玩「no look goal」，即係球員面對空門起腳時，故意擰轉頭射入，扮晒輕鬆瀟灑，利物浦前鋒羅拔圖法明奴就係當中佼佼者。
不過，講「no look」界代表，一定要提意大利前鋒基拿甸奴，佢喺2006年世界盃4強加時最後緊張時刻，都可以使出一招「no look pass」，妙傳迪比亞路射入，正式判德國死刑。隨住呢位36歲老將依家決定掛靴，佢呢下「no look pass」成為永恆經典。
基拿甸奴無疑係近14年意大利最佳前鋒之一，踢法似另1位「基佬」恩沙基，都係機會主義者純射手，2003至05年連續2季意甲，都為帕爾馬射入23球，成功登入豪門獲AC米蘭收歸旗下。
基拿甸奴不負所望，為AC米蘭贏得歐聯、世冠盃，2006年更幫意大利捧過世界盃冠軍，登上事業巔峰，佢總共為意軍上陣60次入19球。
不過，再鋒利嘅刀都有生銹嘅一日，基拿甸奴離開AC米蘭之後，輾轉效力過費倫天拿、熱拿亞、博洛尼亞，甚至去過中超為廣州恒大捧聯賽冠軍，今季一直冇班落，最終決定掛靴。
基拿甸奴退休之後，意大利2006年世盃冠成員只剩下，保方、迪羅斯、巴沙利、薩加度仲踢緊。
東網體育FB同你追實體壇每個精彩時刻！
Follow東網體育IG一齊撐本地運動員！