【有片】開齋兼起孖！保特：入波係我工作
20181012
東網電視
更多新聞短片
(Getty Images)
澳職即將開鑼，好多澳職球隊組軍七七八八，安排熱身賽，一直喺中岸水手跟操嘅百米飛人保特，周五在一場熱身賽大顯神通，取得球員生涯首個入球，而且一入就連入兩粒，協助球隊大勝Macarthur South West 4比0，賽後保特好招積咁話：「我前鋒嚟嘛，入波係我工作！」
曾贏得8面奧運金牌、擁有男子100米世界紀錄嘅保特，自2017年退出田徑壇後一直想圓足球夢，希望有朝一日加盟曼聯，為達夢想曾去多蒙特試腳，32歲嘅佢今年8月來到澳職中岸水手，經過幾個月磨鍊終於取得成果。
保特今場表現活躍，踢到下半場初段中岸水手領先2比0嘅時候，55分鐘，保特接應隊友中場妙傳，佢在中路靠左位置接應後發揮佢最擅長嘅速度，壓過對方後衞入禁區，再起左腳抽射破網。入波後保特擺出招牌嘅射手動作，即係佢贏得奧運金牌之後做嘅動作，全場球迷都戥佢高興。
好事一不離二，68分鐘保特力迫對方後衞，搞到對方後衞同門將誤會派膠，保特即時上前將皮球送入空門。
連入兩球後，保特表示：「首場入兩球嘅感覺好正，入波係我工作，我一直努力證明自己，令自己變得更好，不斷進步。」
東網體育FB同你追實體壇每個精彩時刻！
Follow東網體育IG一齊撐本地運動員！