日本南韓齊齊贏波!孫興民嬲嬲

20181012
東網電視
更多新聞短片
(法新社圖片)
今晚舉行嘅兩場國際熱身賽,日本同南韓兩支亞洲球隊都齊齊喺主場爭氣贏波,其中日本喺新潟憑住南野拓實及伊東純也各建一功,加上對手烏龍波,以3比0大勝巴拿馬,但係連續兩場入波嘅功臣伊東純也,喺下半場30分鐘右腳受傷,要用擔架抬出球場,周六需作詳細檢查,先知道下仗可唔可以對烏拉圭。
日本今場希望繼續加強新老球員磨合,年僅19歲、身高1.88米嘅比甲球隊聖圖爾登後衞富安健洋,更加首次披上大國腳戰衣,佢表現非常穩定,且不時協助進攻,獲得好評。
至於南韓雖然有首席球星孫興民射失12碼,但仍然憑住今場嘅MVP黃義助同鄭又榮各入一粒,喺首爾主場61,470名觀眾面前,以2比1力克烏拉圭,認真巴閉。
上任後兩戰全勝嘅葡萄牙籍新帥保羅賓度,今場同樣試用唔同球員,包括闊別「太極虎」2年、身高1.9米嘅法甲蘭斯前鋒石鉉俊,保羅賓度認為「烏拉圭是一支經驗豐富、組織良好嘅球隊,所以我認為對我哋嘅球員而言,呢場係好有價值嘅勝利 」。
孫興民即使今場12碼宴客,不過總體表現唔錯,保羅賓度都大讚佢係世界級球員,但係「民仔」就好唔開心:「贏波固然好好,但我好嬲我自己。我做得唔夠好,我應該可以踢得好啲,要反省一下自己。」
東網體育同你追實體壇每個精彩時刻!