福仔敗家世紀射失 英軍放生克羅地亞

20181013
東網電視
更多新聞短片
(Getty Images)

中柱中楣唔算嘔血,最慘係見住拉舒福特超級敗家,英格蘭大好形勢憾和克羅地亞!歐洲國家聯賽三獅兵團造訪格仔兵團,英軍派哈利卡尼、福仔及史達寧組成攻擊線,上、下半場先有艾歷迪亞及哈利卡尼中柱中楣,跟手輪到福仔表演,於禁區內空晒、有晒時間準備下,竟然射波變交波畀對手門將,最後雙方互交白卷完場,英軍已四場正式賽事不勝。

英格蘭於歐國聯首仗,主場反敗予西班牙,今戰克羅地亞繼續受罰閉門作賽,英軍作客冇咁難踢,當然希望打開歐國聯勝利之門。上半場雙方食咗豬油膏一樣,夾埋只有四次埋門,最佳入波機會於完半場前出現,佐敦軒達臣右路角球斬中,艾歷迪亞近柱頭槌一批中柱,馬古尼、福仔又未能補中。

換邊後英軍加強攻力,右路罰球斬中,哈利卡尼空晒一頂中楣,51分鐘巴克利殺入禁區,疑似遭列比錫從後侵犯,但球證冇畀12碼。令英迷最嘔血場面到55分鐘出現,基爾獲加右路靚扯入禁區,福仔空晒面對門將,睇到定晒左腳一射竟然完全冇力,門將輕易接實,堅係唔入難過入。2分鐘史達寧畀多次機會福仔,但拉舒福特又好似唔識踢波一樣,於禁區心臟地帶擺軚一射,又係毫無角度,畀對手門將撲出。

冇主場球迷支持,格仔兵團全場冇喱神氣,新科世界足球先生莫迪歷,以及好拍檔拿傑迪錫完全冇嘢睇,70分鐘列比錫左路出右腳彎遠柱又僅僅柱邊出界,最終雙方打成0:0完場,雙方兩戰均同得一分,遠遠落後六分在手嘅西班牙。

東網體育同你追實體壇每個精彩時刻! 
https://goo.gl/ewVpvE