香港隊　落區搞「青訓」　韋特：幫球員回氣

香港足球代表隊周六（13日）拉隊到安徒生會竹園中心與一大班小朋友交流。他們先以不同的方式向對方打招呼，再聆聽龜兔賽跑的故事，繼而球員和小朋友一同合作完成故事改編，最後更出了球場一起踢球，場面相當熱鬧，笑聲更是連綿不絕！

活動完結後，主教練韋特指有利球員恢復：「今次係一個好美妙嘅經驗，無論球員定係小朋友都好優秀，球員好落力同小朋友玩，會喺小朋友留低一個深刻嘅印象。球員要恢復精神，同小朋友玩就係好好嘅精神食糧，畀到球員力量去應付之後嘅比賽。我又認為香港隊作為社會上嘅一個焦點，要負起社會責任，為公眾做番啲嘢。」

至於隊長葉鴻輝稱有助減壓：「香港隊比較少呢啲慈善活動，球員喺賽前賽後都會比較大壓力，同小朋友玩可以放鬆到心情。我本身都鍾意小朋友，同小朋友玩可以有一個真正交流，佢哋會對住你講嘢又或者笑。」

而後衞劉學銘則大讚活動一舉兩得：「我覺得幾新奇，今次教練叫我哋回饋社會，我覺得好有意義！同小朋友玩可以放鬆之餘又可以畀多啲人認識香港隊。」

對於下場作客印尼的比賽，韋特坦言期待：「我哋已經急不及待想踢呢場比賽，上場比賽雖然贏唔到，但係表現好好，我睇咗場波5、6次，我已經好期待去準備下一場比賽。」

早前在亞運會對陣印尼取得入球的「學銘」，揚言今次要「復仇」：「其實都好期待，亞運對過印尼，自己又有入波，不過輸咗。所以自己都好希望用另一個身分再對多一次印尼，更希望今次贏到！」現正等待香港隊首次上陣機會的茹子楠盼下場能夠披甲：「我覺得上場其實自己未準備好，所以要喺訓練入面表現畀教練睇自己我得！嚟緊呢場我已經ready！」