恭喜！直布羅陀取得史上首勝
20181014
東網電視
更多新聞短片
(互聯網)
歐洲國家聯賽成立令好多球迷疑惑，究竟呢個賽事踢緊咩？其實比賽其中一個目的就係將國家隊分唔同級別，球隊各自喺自己級別戰鬥，講白啲即係勁有勁鬥，水有水鬥，而周日凌晨有場D4組別賽事，阿美尼亞主場迎戰直布羅陀，結果爆出大冷門，成軍只有5年嘅直布羅陀以1比0贏波，取得佢哋成軍後首場正式國際賽勝仗，真係要食牛雜慶祝！
直布羅陀人口只有3萬，2013年先至加入歐洲足協，參加2016歐國盃外圍賽，當年有報道球隊全為兼職球員，正職計有警察、消防員、文員及客戶服務員等，現時世界排名198位，一支咁嘅球隊要喺歐洲高水平國際賽贏波，真係冇乜可能。佢哋之前有好多場敗仗，但亦都贏過兩場，不過兩場都係友賽，今場喺有競爭性嘅歐國聯賽事贏波，就係史上首次。
估唔到佢哋今場成功創造奇迹，作客世界排名100位嘅阿美尼亞，不但後防成功力保不失，更喺下半場50分鐘由行政文員Chipolina射入12碼，最終以1比0獲勝全取3分，賽後職球員忘情慶祝，場面感人。
東網體育FB同你追實體壇每個精彩時刻！
Follow東網體育IG一齊撐本地運動員！