【有片】曼聯棄將＋紅軍孖寶發威 荷蘭炒德國

歐洲國家聯賽矚目之戰A1組荷蘭主場對德國，兩隊喺80至90年代為死對頭，雖然近年實力下滑，但今仗仍然充滿牙骹味，結果佔主場之利嘅荷蘭，以3比0大炒德國，創下該隊歷來對德國最大勝仗，現任主帥、90年代名將朗奴高文相當激動，反觀德國遭受沉重打擊，領隊勒夫重建球隊難度更高。

荷蘭今仗表現進取，開賽30分鐘一次門前混戰，憑利物浦中堅華基爾雲達積克頭槌攻破德軍大門，半場領先1比0，易邊後德國換入利萊辛尼，一度扭轉形勢，荷蘭陷於死守劣勢，完場前10分鐘更有後衞哥爾尼維特禁區內從後踢跌馬菲加斯真特，可惜球證未判予12碼，荷蘭免去被追和，注定德國唔好彩。

賽事末段德國全軍上前，但中場傳送頻頻失誤，造就荷蘭有多次反擊機會，曾踢過曼聯嘅前鋒迪比錯過多次機會後，終在86分鐘為荷蘭射入燕梳球，雖然迪比之後有一次攻門射中楣，但完場補時3分鐘韋拿杜姆展示個人技術妙射錦上添花射成3比0，荷蘭贏波全取3分，德國則近3仗僅得1和2負，且無法取得入球，似乎仍處於低潮，相信暫難反彈。

東網體育FB同你追實體壇每個精彩時刻！

http://bit.ly/2ecTF2A　

Follow東網體育IG一齊撐本地運動員！

http://bit.ly/2EYxoRh