英格蘭頒禁粗口令！邊個國腳最爛口？
20181014
東網電視
更多新聞短片
英格蘭日前喺歐洲國家聯賽作客克羅地亞一仗，主隊因為被罰閉門作賽，全個球場都冇觀眾，靜蠅蠅咁踢足90分鐘。據英國《太陽報》報道，英格蘭賽前特別向一眾國腳頒發「禁粗口令」，因為喺一個冇聲嘅球場內，如果球員仍然大聲爆粗，肯定會畀電視直播收晒聲，結果全隊球員都好聽話，除咗一個人──哈利馬古尼！
當比賽去到51分鐘，哈利馬古尼防守嗰陣失咗個角球，不過佢就堅持自己並冇掂到個波，一時火遮眼大聲叫咗個「Fxxk」字，成為英格蘭全場唯一一個爆粗球員。不過，英格蘭領隊修夫基並冇打算向佢作出處分，事關球員踢波期間講粗口其實好平常，只不過今次情況特殊，失禮自己啫。
東網體育FB同你追實體壇每個精彩時刻！