【危險人物】賓施馬官非纏身 鑊鑊都咁甘!

20181019
東網電視
更多新聞短片

皇家馬德里前鋒賓施馬好波冇人懷疑,不過佢場外嘅紀律就好多人質疑,呢位30歲前鋒今次捲入綁架案件,罪名極大,不過賓施馬其實早就面對過唔少指控,包括「嫖雛妓」、「性愛影片勒索」同「洗黑錢販毒」案件,絕對係鑊鑊新鮮鑊鑊甘!

賓施馬喺2010年世界盃前,被指同3名國家隊隊友(列貝利、賓艾化、高禾)一齊光顧妓院,本來嫖妓喺法國並非犯法,但係同賓施馬、列貝利進行交易嘅妓女Zahia Dehar,當時年齡不足16歲,與未夠16歲少女發生性行為就係犯法。經過連番審訊後,檢控官最後因為冇辦法證實賓施馬等人當時知悉對方未成年,結果撤銷檢控。

去到2015年11月,賓施馬又涉嫌用性愛影片勒索法國國家隊隊友華布拿,而且一度被警方拘捕。案情指3名疑犯拎住性愛影片,向華布拿勒索15萬歐元,警方竊聽得到嘅電話錄音,更有賓施馬充當中間人,安排華布拿去交款嘅對話。案件經過差唔多3年仍然未結案,據報巴黎法院今年內會作出最終審訊。

另外喺2016年3月,法國《解放報》爆料話賓施馬再被法國警方調查,因為佢涉嫌一宗洗黑錢兼販毒案,案件牽涉一間叫BH嘅公司,而公司最大股東就係賓施馬!據報警方對毒販進行電話監聽,錄音中多次提到賓施馬個名,不過冇證據顯示賓施馬有直接參與罪行,事件不了了之。

東網體育FB同你追實體壇每個精彩時刻!
http://bit.ly/2ecTF2A