港甲　愉園大勝南華6連勝！

港甲周日（21日）於蒲崗村道公園上演「南愉大戰」，愉園憑袁世傑、安度美斯和馬希卡歷各建一功，取得聯賽6連勝，續居榜首。

榜首愉園開賽初段頻頻製造威脅，2分鐘前鋒陳立明左路K角位狂抽，惜柱邊出界。4分鐘後，再有右翼袁世傑傳中，前鋒安度美斯鏟射卻未能命中。9分鐘先有中堅李志豪長傳，陳立明頭槌衝頂，2分鐘後，中場馬希卡歷主射罰球，唯一一被南華門將周朗僖沒收。南華並非完全捱打，黃皓雋右路傳中，羅敏聰車身窩利，惟角度太正被愉園門將鍾偉豪接實。愉園及後再有安度美斯轉身抽射，惟未能成功把皮球送入網，半場雙方互交白卷。

換邊後僅1分鐘，安度美斯截得皮球後勁射僅柱邊略過。愉園的努力終在60分鐘收到回報，袁世傑接應張俊軒橫傳大腳抽入，為球隊先開紀錄。南華隨即反撲，64分鐘，先有蘇友鈿接應葛祖威傳送勁射，再有葛祖威扣過鍾偉豪後起腳惜被對手封阻。未能為球隊追和之餘，更被愉園於6分鐘內入兩球，先有安度美斯右路狂抽，後有馬希卡歷憑一己之力窄位射入，為球隊拉開比數至3比0，最終愉園亦以這個比數擊敗南華，取得聯賽6連勝，以18分穩坐榜首。

賽後愉園教練岑國培坦言難踢：「對手表現好好，令我哋好多有經驗球員都好難應付場比賽。」他又指球員今場被氣氛影響發揮：「球員心急想贏波，影響咗部署，下半場中段都同球員講，唔好畀氣氛影響到節奏，要由中間慢慢在送上前，唔好後場一腳斬上前。」取得6連勝的愉園，「岑Sir」期望：「唔會畀壓力自己，希望佢哋一場比一場進步，踢番練習嘅部署、要求。」至於現效力愉園的前港隊後衞李志豪表示：「始終踢咗咁多年，有啲感觸，南華所有人都唔同晒，都係一個新開始。」

而南華總教練潘耀焯對球員表現感滿意，又指氣氛有利球員：「今場氣氛相當好，球員有球迷打氣又會精神啲、落力啲。」問及南華現時目標時，他明言以培育球員為主：「我哋希望培訓多啲年輕球員，好似今場有兩個16歲嘅球員落去踢，表現都唔錯，喺U18都會提拔1至2名球員上嚟，等佢哋吸收經驗。」