衰夠未?球霸沙治奧拉莫斯練波恰𡃁仔

20181023
東網電視
更多新聞短片
(Getty Images/互聯網)

西甲班霸皇家馬德里近排戰績低迷,唔止主帥洛佩特吉備受下台壓力,其實成隊波依家都係怨氣滿身,淨係睇吓佢哋日前練波,隊長沙治奧拉莫斯竟然因為一次同小將意外碰撞,走去兩次搵波省對方,真係超冇品囉!

話說日前皇馬練波,成班球員玩吓類似手球遊戲,點知一次小將利古隆飛身搶波,意外撞中沙治奧拉莫斯個鼻,就即時引發衝突。身為隊長嘅佢,唔止冇話做個好榜樣畀班小將睇,竟然即刻將手上個波掉低,然後「窩利」抽向對方,好彩利古隆及時搵手擋走個波先冇受傷。
之後個遊戲練習隨即結束,成班球員轉身步離球場,但沙治奧拉莫斯明顯怒氣未消,趁住大家唔為意,再將腳下皮球再省向利古隆,超小氣!呢個舉動連隊友莫迪歷都覺得唔妥,走埋去幫口安撫幾句,沙治奧拉莫斯先識話笑番吓,終於肯收手。

可能都知事件之後曝咗光,「大蝦細」行為超羞家,事後沙治奧拉莫斯喺社交網鋪咗張8人合照,寫上:「呢種事其實喺訓練經常出現,但我應該為我嘅行為道歉,最終我同利古隆嘅小隊贏咗分隊賽,件事就咁算啦,馬德里加油!」又話好少事,但又道歉,你講緊乜呀?不過都係利古隆最識撈,事後仲識幫隊長轉發twitter,仲補多句:「永遠支持我嘅球隊同隊長,明天比賽加油!」唉,好黑暗呀!

東網體育同你追實體壇每個精彩時刻! 
https://goo.gl/ewVpvE