歐聯免費波 C朗倒戈紅魔例入波
20181023
東網電視
更多新聞短片
歐聯分組賽今明兩晚重燃戰火，今晚H組矚目大戰曼聯主場硬撼祖雲達斯，焦點毫無疑問落喺倒戈嘅基斯坦奴朗拿度（C朗）身上。呢位葡萄牙國腳之前2次代表皇馬倒戈鬥「紅魔」都有士哥，完全唔會留情面，加上祖記今季表現遠比「紅魔」穩定，近年對英超球隊亦贏多輸少，祖記讓平半波童捧上盤。（奇妙電視77台、有線662、602台及Now 643周三凌晨3時直播）
C朗自從2009年離開曼聯後，今次係佢第3次喺歐聯對番「紅魔」，之後2次代表皇馬上陣係喺2012/13年16強，C朗主、客兩回合都有入波，包括次回合喺奧脫福射入奠勝一球，助皇馬以總比數3比2淘汰曼聯。雖然C朗今屆首場分組賽對華倫西亞領紅被逐，但上場喺佢缺陣下，祖記仍憑保羅戴巴拿連中三元以3比0大勝年青人，早前喺國際賽受傷嘅戴巴拿上場聯賽已經復出，今場有望正選拍住C朗喺前線搵食。
「斑馬兵團」食住英超兵
祖記上場聯賽雖被熱拿亞逼和1比1，開季10連勝斷纜，不過論整體表現，祖記今季仍然比「紅魔」穩定得多。「斑馬兵團」祖記對上一次喺歐聯輸畀英超球隊，已經要追溯到2008/09年16強作客輸畀車路士0比1，之後7戰4勝3和，當中近5次仲贏咗4次，包括上屆16強作客擊敗熱刺、與及2015/16分組賽作客贏曼城，出戰英超球隊完全未驚過。
曼聯上周末作客打和車路士2比2，可以講係今季表現最好嘅其中一場比賽，不過睇番比賽過程，「紅魔」上半場基本上捱打，莫連奴喺戰術運用上都冇咩大突破。曼聯今季聯賽連盃賽6場主場只贏2場，而且對手實力唔算強，今次對住近4屆兩度殺入歐聯決賽嘅祖記，相信唔易應付，祖記讓平半一於捧上盤。●笛子波童
東網體育同你追實體壇每個精彩時刻！