搵警察打假波?前南韓國腳戇居被捕

20181023
東網電視
更多新聞短片
揾一個警察打假波咁白癡?現實真係有咁白癡嘅人,件事最近發生喺南韓。
10月中旬韓媒披露,曾代表國家隊5次、前城南一和球員張學榮被警方拘捕,罪名係「操縱假波」。報道稱,37歲嘅張學榮喺9月21日去咗釜山,約見作緊客嘅牙山木槿花後衞李漢泉,因為對方係前輩,李漢泉冇諗過乜就赴約。雙方喺酒店見面後,張學榮向呢位後輩提出:「你能唔能夠喺上半場22分鐘故意犯規領紅出場,我會畀5000萬韓元(約35.2萬港元)報酬你。」但係李漢泉馬上嚴詞拒絕,仲憤然離場。
當日晚上,佢仲將呢件事話畀主帥朴東赫知,經過內部商議,決定向韓國職業足球聯盟申報,警方隨後經過調查,掌握確鑿證據就喺10月13日將張學榮拉咗,29歲嘅李漢泉立刻成為「韓國足壇嘅基藍馬」,一個正義嘅象徵。
踢緊韓職挑戰聯賽嘅牙山木槿花,以京畿道安山市為主場,班人都係履行緊兩年義務兵役,不過被調去警察部門嘅韓職球員組成,所以被稱為 「警察足球會」。自稱第一次做呢種衰嘢嘅張學榮,夠膽搵差佬打假波,可能真係等錢使急到short咗。
查實又唔怪得張學榮咁癲,事關2011年發生嘅「韓國賭波風暴」,近百名球員被捕,仲有全北汽車球員鄭宗官為此自殺,重災區就係代表軍隊嘅尚州尚武,因為當兵只得唔夠一千港元津貼,收入少過打波嗰陣好多,係易受誘惑啲嘅。
東網體育FB同你追實體壇每個精彩時刻!