記者會搞大龍鳳 拜仁名宿：真丟架！
20181023
東網電視
更多新聞短片
(互聯網)
拜仁慕尼黑周二晚將在歐聯再度亮相，作客AEK雅典，大戰當前繼續有花生食，因為佢哋上周五急Call記者會餘波未了，名宿畢列拿開口鬧爆，佢話今次記者會真丟架，對於拜仁嘅形象係毀滅性。
話說上周五拜仁幾位高層漢尼斯、路明尼加同沙歷咸美錫突然開記者會，當大家以為佢哋宣布尼高高華落鑊，由雲格接手之際，點知原來係冇嘢宣布，只係力撐主帥同隊中主力，喪鬧傳媒叫唔好亂寫。
雖然拜仁喺之後嘅聯賽終於贏波，但呢個記者會同樣引起軒然大波，德國傳媒組織同主要傳媒繼續炮轟拜仁高層，鬧佢哋不接受批評，依家又有74年世界盃冠軍西德名宿畢列拿加入抨擊行列。
「我真係好難過，今次記者會，摧毀了球會近年為了擺脫傲慢所做嘅工作，48年來，我未想過拜仁嘅形象會變到咁差。」畢列拿指出：「我實在搞唔清楚，路明尼加一開始大談尊重，但唔夠10分鐘，漢尼斯就出言侮辱一位前拜仁球員。」
東網體育FB同你追實體壇每個精彩時刻！
Follow東網體育IG一齊撐本地運動員！