偷情買醉瓣瓣齊 桃田係咪得罪人呀？
20181025
東網電視
更多新聞短片
（互聯網）
人紅是非多真係冇講錯！浪子回頭的日本羽毛球天王桃田賢斗，今年戰績火紅連奪亞洲及世界賽冠軍仲做埋「世界一哥」，但行為不檢點連環被日本傳媒追殺，踢爆他「姊弟戀宿一宵」及「買醉街頭」等醜聞，而且都在桃田揚威之時來「贈興」！
現年24歲的桃田賢斗周日(21日)勇奪丹麥公開賽男單冠軍，25歲緋聞女友福島由紀同時獲得女雙冠軍，豈料翌日日本《周刊新潮》又嚟「贈興」，曝他和福島由紀在國訓中心過夜醜聞的「幕後細節」，以及桃田早前在南韓公開賽期間「街頭買醉」，又引發新一輪輿論。
今年7月接受日本權威體育雜誌《Number》獨家專訪時，桃田談及舊事：2016年4月的賭博醜聞，即被日本羽協剝奪里約奧運參賽權及停賽，而停賽期間又被影到在新宿酒店熱吻媽媽桑醜態；他表示經過停賽期反省必定痛改前非，但極具諷刺的是這番話後不久，日前又被八卦周刊踢爆他在9月25日至30日南韓公開賽期因腿傷棄權，晚上一個人外出被記者跟蹤到在首爾街頭喝得酩酊大醉深宵不歸，幸好冇走入賭場超過「底線」。
9月底時桃田登上「世界一哥」，當天八卦周刊就爆出他今年5月與福島由紀在宿舍過夜，累福島差點錯過「飛行藥檢」，已令新一哥稱號蒙污。這期周刊揭出當初日本羽協想向日本奧委會隱瞞桃田與福島「偷情」事件，無奈紙包不住火被周刊揭發，兩人日前已被羽協嚴重警告，風波算告一段落，但桃田連續行為不檢再成爭議焦點。
東網體育同你追實體壇每個精彩時刻！