食冤枉詐胡又領紅 熱刺歐聯慘和大鑊
20181025
東網電視
更多新聞短片
（Getty Images）
熱刺畀球證打劫，歐聯痛失關鍵兩分！歐聯分組賽熱刺作客燕豪芬，客軍頭兩仗分別不敵國米同巴塞，要後上取得出線席位今仗不容再失。不過熱刺今仗堅黑，有達雲臣山齊士入波被屈越位，下半場尾段又有隊長洛里斯領紅，最終臨尾香被追平2:2完場，三戰僅得一分，益晒巴塞同國米。
熱刺球員質素、經驗都於對手之上，但形勢佔優下反而先失一球，夏榮羅辛奴抽射省中艾達韋列特入網，主隊先開紀錄。之後熱刺大反擊，達雲臣山齊士門前抽入，球證吹話越位，但哈利卡尼當時於對手門將之後，完全無阻門將視線，咁樣吹越位非常唔抵。
不過熱刺始終高質，盧卡斯莫拉、哈利卡尼於上、下半場各入一粒反先。熱刺跟手控球在腳，燕豪芬完全處於捱打狀態，睇嚟熱刺可以全取三分。但一次大意失誤埋下失分伏線，夏榮羅辛奴突破越位快篤，洛里斯出迎將佢踢跌，球證拔紅將佢趕離場。熱刺打少一個下，87分鐘被盧克迪莊近門射入追成平手。補時階段，哈利卡尼於禁區空晒一抽，被對手及時攔截，跟手近門抽射又唔中龍，熱刺整定跌兩分。
東網體育FB同你追實體壇每個精彩時刻！