埃及文明包辦四球 利物浦搞掂紅星登榜首
20181025
東網電視
更多新聞短片
（Getty Images）
延伸閱讀：
【天使頂級世界波 聖日耳門補時和拿玻里】
「埃及文明」鋒線翻生，利物浦歐聯大勝！上輪不敵拿玻里嘅紅軍，於晏菲路出戰同組實力最弱嘅貝爾格萊德紅星，三分志在必得，本季久沉嘅穆罕默德沙拿、羅拔圖法明奴及沙迪奧文尼，雖依然狀態未達巔峰，但對住紅星已經夠殺，最終沙拿梅開二度，法明奴、文尼各入一粒，以4:0大勝對手。
因隊長佐敦軒達臣受傷，領隊高普搵法賓奴泰華利斯打正選，「埃及文明」鋒線負責攻堅。梳頓沙基利首發落場亦有好表現，11分鐘妙傳高波入禁區，沙拿控得靚但一射過唔到門將。20分鐘紅軍開紀錄，沙基利直線劏穿對手防線，安德魯羅拔臣底線傳靚地波，法明奴控定抽入。
沙拿本季始終甩甩漏漏，先接應文尼左路傳中，左腳竟然食唔應；31分鐘，文尼第一時間靚傳，沙拿六碼點單對單對住門將都射唔入，雖然係越位在先，但咁都送唔到個波入網認真得人驚。完半場前沙基利接應韋拿杜姆妙傳，第一時間質畀沙拿，呢名埃及前鋒終於抽入，半場主隊領先2粒。
換邊後文尼於禁區內被侵犯，佢大動作跌低呃到球證，沙拿主射12碼大腳抽入拉開比數。之後紅軍左路罰球斬中，紅星守衞頂波頂落手，球證再度畀12碼，但文尼操刀被救中楣。雖然唔入極刑，但之後後備入替嘅史杜列治交出靚助攻，文尼一控一篤搞掂4:0。之後紅軍有拉爾拉拿單刀唔入，文尼大好機會亦射網側，利物浦脆脆哋贏4球，分組賽3戰2勝1負6分排榜首。
延伸閱讀：
【天使頂級世界波 聖日耳門補時和拿玻里】
東網體育FB同你追實體壇每個精彩時刻！