天使頂級世界波 聖日耳門補時和拿玻里
20181025
東網電視
更多新聞短片
（法新社圖片）
迪馬利亞超靚世界波，補時救番PSG一命！歐聯分組賽巴黎聖日耳門主場迎戰拿玻里，，坐擁尼馬、基利安麥巴比同卡雲尼超豪華鋒線嘅主隊，面對對手鐵血後防得個樣，反而拿玻里實牙實齒仲實際，恩治斯尼、梅頓斯分別建功兩度為客軍領先，聖日耳門於補時仲係輸緊1:2，好彩有「天使」挺身而出，禁區外左腳靚射遠柱網仔入網，驚險逼和對手2:2，唔使跌晒3分。
PSG於首輪作客不敵利物浦，今仗主場鬥另一勁敵拿玻里，尼馬、麥巴比同卡雲尼表現係落力，但卻腳頭無靈。7分鐘卡雲尼左腳窩利抽射被救出，之後麥巴比禁區左腳射近柱龍都唔中。拿玻里企穩陣腳後攻勢仲入肉，梅頓斯接應左路妙傳射中楣已為主隊敲響警號，之後荷西卡利祖右路彎個靚中腰波到心臟地帶，恩斯治尼入楔妙射逗入，半場客軍領先1球。
換邊後主隊瘋狂進攻攻勢浪接浪，50分鐘卡雲尼門前射失，但就算入都越位在先，梅尼亞近門勁頂，過不到今場表現出色嘅客軍門將奧斯賓拿。61分鐘主隊終於扳平，尼馬質個靚波畀梅尼亞右路出波，馬里奧雷爾欲解圍鏟咗入網，PSG憑一個烏龍波扳平。但拿玻里真係好韌，77分鐘客軍禁區外遠射，馬昆奴斯哥利亞屁股停定個波，梅頓斯一抽搞掂又試領先。
但聖日耳門命不該絕，補時階段迪馬利亞於禁區外起黃金左腳靚射，個波直飛遠柱網仔入網，PSG戲劇性追成2:2平手，但3戰1勝1和1負積4分，落後5分嘅拿玻里同6分嘅利物浦之後排小組第三。
東網體育FB同你追實體壇每個精彩時刻！