【賽後評】利物浦要破低迷 就要出沙基利!

20181025
東網電視
更多新聞短片
(法新社圖片)
利物浦於歐聯分組賽主場出擊,面對同組最弱對手貝爾格萊德紅星,事前話利物浦會大炒紅星,唔少利迷都會存疑,因為近期利物浦攻力減弱,埃及文明鋒線嚴重失靈,中場又缺創造力,利迷都好擔心愛隊。今仗紅軍大勝4:0,頭2球雖然由羅拔圖法明奴同穆罕默德沙拿建功,但最大功勞係打攻中嘅梳頓沙基利,兩個入球佢都交出世界級妙傳。「瑞士美斯」提供了紅軍目前最需要嘅創造力,絕對值得領隊高普畀更多正選機會。
紅軍一開波就受制對手超緊身攔截,形勢一度受壓,能夠打開缺口多得沙基利。佢首先於中場附近逼甩對手腳下球,跟手交出超靚直線,教埋左閘安德魯羅拔臣走落底線傳中,先出現法明奴打開紀錄嘅入球。完半場前,沙基利靈活走位,於右路接應韋拿杜姆直線,佢第一時間印個波入中路,力度恰到好處,沙拿舒服入楔射成2:0。如非沙基利兩度妙傳,紅軍實難以大勝。
沙基利本季以低價1300萬鎊轉投利物浦,一般認為佢係沙拿後備,會打三前鋒嘅邊鋒。但沙基利腳下功夫好具創造力,亦勝任攻中位置。紅軍今夏放棄購入費基亞,阿歷士張伯倫又長傷,拿比基達又適應需時,沙基利就係打攻中最佳人選。高普要激活埃及文明鋒線,一定要有個畀多Key-Pass嘅攻中,如高普畀多啲機會沙基利,紅軍或可打破近期鋒力「低迷」問題。
東網體育FB同你追實體壇每個精彩時刻!