【人物誌】希比：我唔應該離開阿仙奴
20181025
東網電視
更多新聞短片
(Getty Images)
周五(26日)凌晨歐霸盃L組，車路士主場對巴迪，將會迎來1位倫敦舊朋友，就係曾經效力阿仙奴嘅希比，呢位37歲進攻中場已經第5度為母會巴迪效力。
人生兜兜轉轉，希比今場又重返倫敦，遇上昔日老對手車路士，百般滋味在心頭。賽前佢接受傳媒訪問，承認自己當年唔應該離開阿仙奴。
希比可以話係白俄羅斯史上最具名氣嘅球員，2000年由白俄勁旅巴迪轉投德甲史特加，打出名堂，2005年更上層樓，加盟阿仙奴，創出事業高峰，包括協助兵工廠打入2006年歐聯決賽，可惜不敵巴塞隆拿。
希比2008年轉投巴塞隆拿，以為可以再創顛峰，但卻成為走下坡嘅轉捩點，效力1季就被不斷外借，包括去到伯明翰、史特加、禾夫斯堡，之後幾乎每1季都轉會，淪為「人球」，今年重返巴迪，更加係第5度加盟呢支白俄球隊。
希比依家回想起當年轉投巴塞，感到後悔：「好多人經常問我點解離開阿仙奴，真係好難解釋，我都唔知點解，我亦經常問自己點解咁做。」
過去已經無法改變，希比亦都看透，今次重返倫敦比賽，佢話最開心可以見番昔日隊友法比加斯，如果兩人今場可以同場競技一定好有趣。
東網體育FB同你追實體壇每個精彩時刻！
Follow東網體育IG一齊撐本地運動員！