【港超專版】郭時興撐年輕人踢波追夢

由2013年開始一直擔任元朗足球會榮譽主席及副會長的郭時興，雖然今季改以贊助人身份冠名球隊為「佳聯元朗」，相對就球會運作的參與亦較少，然而他對足球及社區事務的熱誠卻有增無減，亦希望給予隊中年輕球員發揮的平台，讓他們的足球事業得到更佳發展。

■圖/文：何彥霆

自小在農村長大的郭時興，靠賣活家禽起家，到現在於行內獲得「冰鮮雞大王」的稱號，亦建立了自己的冰鮮禽畜王國，他近幾年持續以不同形式支持元朗，除了因為自己是元朗人之外，對足球的熱誠亦促使他投身足運行列。

郭時興透露：「我本身喺農村長大，唯一興趣就係踢波，喺元朗成長到依家，都想回饋一下社區。我窮困出身，希望幫年輕人踢波追夢。球會每一季都有唔同嘅球員加盟，例如今季一班U23小將，我哋會同球員講，球會班費好少，高人工就畀唔到你哋，但希望畀到正選你哋踢，自己爭取表現，第日畀大球會高薪挖角，為元朗又好，為自己對足球嘅熱誠都好。上一季差唔多全部球員畀人挖晒，淨係留番『阿庭』（羅振庭），佢係好球員，想佢留喺度幫年輕一代。」

在元朗重返頂級聯賽後，郭時興已跟球隊度過了5個球季，最難忘的必定是上季奪得「高級組銀牌賽」冠軍，但原來對他來說，這個日子有雙重意義︰「最難忘當然係上一季攞銀牌啦，以我哋呢個班費攞銀牌冠軍，真係好振奮，嗰日咁啱係我個孫女5歲生日，所以更加難忘添！」

元朗今季表現同樣帶來驚喜，被問到女兒郭靜然由足主改任球隊經理，若在工作上遇到難題會否向他求助時，郭時興笑言作為贊助人，其主要任務只得一個︰「其實球會啲嘢，佢仲清楚過我！我依家都好少理球會事，主要都係負責贊助同獎金嘅事務多啲！」

冠名贊助 「打救」女子隊

球隊贏波固然高興，但對於郭時興這個足球發燒友而言，能夠協助更多人圓足球夢，其意義和滿足感實在不能用金錢去衡量，因此他今季同時以「佳聯」冠名贊助一支女足乙組球隊（左圖）︰「做生意係搵錢，贊助球隊就冇實質回報，不過贊助可以喺社區幫到年輕人。最近有支女子足球隊諗住散班，亦都搵咗我，佢哋仲話踢波係冇人工，淨係為咗份熱誠，結果依家我喺女足乙組贊助咗一隊波。可能佢哋覺得如果唔係我贊助，球隊就會散班，所以大家凝聚咗一種力量，每人都走多步，盡晒力去踢，結果踢5場贏5場。」