超慘！禾絲妮雅琪患怪病隨時變殘廢
20181026
東網電視
更多新聞短片
(Getty Images)
正喺新加坡出戰WTA女網年終賽嘅前世界「一姐」禾絲妮雅琪，尋晚喺最後一輪分組賽以7比5、5比7及3比6不敵7號種子絲維杜蓮娜後，正式結束今個球季。賽後佢受訪時自爆，原來喺今年美網之前，佢被驗出患上類風濕性關節炎，一種由自身免疫障礙引致免疫系統攻擊關節嘅長期慢性炎症，最終炎症會造成關節變形直至殘廢，超得人驚！
外號「丹麥甜心」嘅佢，話自己最終知道有病後，覺得相當震驚：「真係好震撼，明明自己係個頂級運動員，但突然間，你要去應付一個怪病。但就係咁，你只有正面去面對，好好彩仲有辦法令你感到良好。」禾琪話喺美網之後，佢終於搞清楚一切，然後正式去見最好嘅醫生，展開治療。
禾琪話自己自從溫布頓開始，經常覺得疲倦，然後有朝喺蒙特利爾，我發覺自己連舉起手臂高過個頭都唔得，之後喺辛辛那堤甚至首圈就退賽。呢位前「一姐」話自此佢開始睇醫生去治療，而佢亦非常慶幸自己發現得早。禾琪話自己唔揀喺年中公開病情，而等到依家，喺唔想畀人覺得佢唔舒服；而佢之後仲學識點面對病況，知道自己有時會落唔到床，有時就一切如常。
「丹麥甜心」話佢依家食咗藥後，佢會好正面咁應付病患，並深信唔會影響佢嘅球員生涯。其實佢由年中開始，曾經試過連續5項賽事都喺次圈出局，直到佢喺中國公開賽贏得個人今年第3個冠軍，得以確保躋身年終賽，總算係對自己一個肯定：「喺北京贏出對我嚟講超有意義，因為我之前會有自我懷疑，覺得自己唔會再似以前咁Fit？但醫生話我知，我其實可以做我一切想做，佢話一切都係心理問題，你只有保持自信先會好，而喺北京奪標就畀到我信心。」禾琪話依家要好好對抗病情，佢想做個榜樣畀所有患者，證明佢得大家都得，然後激勵大家一齊抗病咁話！「丹麥甜心」變身「生命鬥士」，真係超感人！
Follow東網體育IG一齊撐本地運動員！
東網體育FB同你追實體壇每個精彩時刻！