啱喎！補時禁止換人 杜絕拖時間
20181027
東網電視
更多新聞短片
(Getty Images)
國際足協引入VAR及各項科技輔助執法，反應大致正面，不過球例改革係唔會停嘅，最新討論就係「補時禁止換人」，原因相信廣大球迷都好清楚，好多教練都鍾意喺補時期間換人，原因係要拖時間，有立法機關建議禁止，國際足協將於明年初討論。
事實又啱，補時得嗰幾分鐘，球員被換落場之後，隨時波都冇機會掂就完場，真係要問句換嚟做乜？當賽果對自己有利嗰陣，好多教練都會喺補時用埋餘下嘅換人名額，你估個教練咁好心，畀球員落場感受氣氛咩？呢個舉動，多數係用嚟拖時間，亦係足球常識。
有關方面希望改善拖延時間情況，決定向呢個足球常識發動挑戰，並輔以有力數據，根據英超統計，有4分1換人發生喺補時階段，國際足協甚至認為，每個補時換人都係為浪費時間而發生，令到足球賽事有效時間大減，現時英超平均有效比賽時間，只有55分09秒。
為杜絕拖時間，立法機構再添一條新例，就係被調離場嘅球員，一定要喺最近自己嘅邊界線離開球場，以免佢慢慢行浪費比賽時間。諗新球例呢條友，都幾絕喎！
東網體育FB同你追實體壇每個精彩時刻！
Follow東網體育IG一齊撐本地運動員！