中國26歲富二代 做國米最年輕主席

20181027
東網電視
更多新聞短片
(互聯網)
26歲張康陽,正式成為意甲傳統勁旅國際米蘭新任主席!16年中國蘇寧集團收購國米近七成股權,董事長張近東成為藍黑兵團話事人。近2年來,張近東委派獨子張康陽處理球隊大小事務,係球隊實際揸弗人。張近東認為時機已經成熟,故宣布張康陽正式坐正,成為國米歷史上最年輕主席。張康陽雄心萬丈話一定會復興國米,更唔排除會收購如美斯級數嘅天王巨星。
張康揚於美國賓夕法尼亞大學沃頓商學院金融專業畢業後,投身金融機構工作,當中做過摩根士丹利,主要負責香港、美國市場,為企業搞上市、投資同融資,儲夠經驗後就返到蘇寧工作。16年蘇寧成國米大股東,張康揚成為球隊九大董事之一。近2年來,張康揚代表爸爸負責球隊一切重要事務,搞得有聲有色,今季國米成功重返歐聯,連球隊副主席、球會名宿辛尼迪都大讚張康揚:「佢好聰明,球會內外事務都處理得好好。依家佢正式成為主席,必定可帶領國米於各層面上更上一層樓。」
國米於官方Twitter中發文,表示無論球隊、球迷,同埋米蘭呢座城市,都等待張康陽到來,歡迎呢名新主席上任。球會為張康揚拍咗條片,入面張康揚相當型仔,有穩重嘅西裝Look,又以符合佢年紀嘅便服Look出現,更以巨型毛筆於白紙上塗上藍黑色,勁有中國味。
當記者問到「史提芬張」(張康揚),未來會唔會收購如美斯般級數嘅巨星,張康揚咁答:「兩年前蘇寧集團成為國米大股東,目標係復興國米,成為全球最勁球會。如果市場上有機會畀我哋改善球球隊陣容,我哋會毫不猶豫咁做。我唔會特別提邊個球員,但如果有機會,我哋一定去收購。」此外有傳國米將於一月,搵來祖雲達斯總經理莫拉塔到國米幫手,以佢豐富實力、經驗同人脈,扶助張康揚。
東網體育FB同你追實體壇每個精彩時刻!