【國家打吡】最多紅牌!拉莫斯茅王之王

20181027
東網電視
更多新聞短片
(Getty Images)
香港時間周日,西甲將上演「國家打吡」巴塞隆拿主場對皇馬。雖然今仗美斯因傷缺陣、C朗亦已離開銀河艦隊,不過依然充滿睇頭,今場勝負好可能決定皇馬主帥洛佩特吉前途,雙方一定搏甩髀。講到搏甩髀,皇馬隊長沙治奧拉莫斯必定身先士卒,呢名西班牙茅王,係「國家打吡」中嘅領紅紀錄保持者,堪稱係終極茅王,唔知今場佢會唔會又抵唔住頸、第六度被趕出場呢?
據紀計,拉莫斯於「國家打吡」上陣40場一共5次領紅,平均踢8場就被罰一次出場,當仁不讓地成為領紅次數最多球員。另外,佢仲攞過19張黃牌,入4球2次助攻,戰績係13勝8和19負。
拉莫斯第一次於「國家打吡」中被趕出場,已經係莫連奴領軍時代,當時佢不斷地侵犯美斯,終於補時階段被罰離場,步出球場時仲同佩奧爾及沙維發生衝突。拉莫斯於13/14、15/16同16/17球季嘅「國家打吡」中都被罰過出場,16/17年嗰次,佢仲係飛鏟美斯已直接領紅,美斯真係見到佢就驚,但今次美斯缺陣,終於可以避開呢個茅王。
講到領紅領黃,拉莫斯保持勁多紀錄,佢係西甲(19次)同皇馬(24次)嘅紅牌紀錄保持者,於歐聯亦「稱王」黃牌紀錄(38次),真係好威呀!