利物浦輸波 有個「反骨仔」走去慶祝！
20181109
東網電視
更多新聞短片
利物浦喺歐聯分組賽意外輸畀塞爾維亞勁旅紅星，全隊上下都好愕然兼傷心，不過竟然有一個「紅軍」球員勁開心，賽後仲公然慶祝球隊輸波，呢個反骨仔就係拿沙馬高域！
「紅軍」喺2014年花成2000萬鎊簽入拿沙馬高域，但係之後一直對佢投閒置散，今季更加被完全放埋一邊，雖然佢冇份踢波，但始終仍然係利物浦一員，點知「紅軍」歐聯輸波後，拿沙馬高域竟然喺twitter慶祝，Like咗一條慶祝紅星贏波嘅訊息。
呢個動作被公開後，大批利物浦球迷群起聲討拿沙馬高域，狂插佢係「反骨仔」，呼籲球會立刻同佢解約，亦有球迷指出拿沙馬高域係由紅星死對頭柏迪遜出身，依家走去撐紅星係「雙重反骨」，又真係幫唔落喎！
畀紅軍球迷插到上天花板後，馬高域現身解話：「各位利迷，我Like嘅係塞爾維亞國腳，而唔係紅星贏波。我出身自紅星同市嘅柏迪遜，而且係柏迪遜死忠球迷，點會Like紅星贏波？仲要係贏我踢緊嘅球隊？多謝各位。」馬高域咁講又講得通，信唔信就睇你自己喇。
東網體育FB同你追實體壇每個精彩時刻！