【人物誌】沙皇棋王孩子王 再見艾沙維

20181109
東網電視
更多新聞短片
「我係一匹駿馬,畀好多天竺鼠包圍住...呢個係一個噩夢,或者死亡嘅感覺就係咁樣...」呢番說話唔係出自咩思想家、哲學家,而係出自俄羅斯天才球星艾沙維。呢位以「食腦」見稱嘅前鋒,唔單止踢波嗰陣充滿智慧,平時亦鍾意思考人生,踢波前夢想竟然係做職業棋手,日前宣布今個星期就會結束職業足球生涯,展開人生另一頁。
現年37歲嘅艾沙維擁有一張「孩子臉」,完全唔似一個縱橫球壇十幾年嘅老將,球場上充滿智慧嘅佢,原來未投身足球前,最大夢想係做職業棋手,細細個就鑽研棋藝,佢回憶:「我第一個興趣就係國際象棋,不過知道自己冇機會做世界第1棋手後,就決定投身足球壇。」
或者係長期經歷「腦力」鍛鍊,艾沙維喺球場上往往可以「快人幾步」、洞悉全局,可惜俄羅斯足球喺過去10年都冇乜起色,最近一次發光就係2008年歐洲國家盃決賽周,當屆艾沙維技驚四座嘅演出,帶領俄羅斯奪得季軍,睇到球迷拍爛手掌,並獲冠以「沙皇」美名。
艾沙維2009年加盟英超勁旅阿仙奴,不過佢似乎未能適應英國生活,加上冇得踢佢最擅長嘅10號位置,整體發展未如理想,只係間中靠住高超個人技術支撐,大戰利物浦一役食出「大四喜」成為佢英超生涯代表作。
目前效力哈薩克球會卡拉特嘅艾沙維,星期日就會進行聯賽煞科戰,佢亦宣布呢場就係佢職業生涯最後1戰:「3年前我已經有呢個決定,約滿之後我唔會再簽約任何球隊,係時候要講再見了。」
東網體育FB同你追實體壇每個精彩時刻!