警方否定強姦引發！切J虐殺案另有內情
20181109
東網電視
更多新聞短片
巴西警方拉咗6名疑犯之後，否定「切J案」起因係強姦，力言主犯Edison一家隱瞞事實，呢宗凶殺案似乎另有內情，唔係性侵咁簡單，當地傳媒甚至懷疑同背叛或者報復仇殺有關！
巴拉那警方星期三證實，已經拉埋19歲青年Eduardo，佢係主犯Edison老婆Cris Brittes個姨甥，加上Allana兩個同學──19歲Igor、18歲David，其中David據講同Allana拍緊拖。連埋有黑幫背景嘅Edison一家三口，呢單案總共6個疑犯被捕，佢哋喺星期三已被提訊，審問咗6個鐘。
3名青年都證實有份參與毆打丹尼爾，並且跟埋車去「棄屍場地」，但就一齊否認有意圖殺害呢名前聖保羅球員。另有證供顯示，Edison同3名涉案青年，將丹尼爾打到得番半條人命之後，本來準備剝佢光豬掟去街邊就算，但係Edison睇過丹尼爾手機啲WhatsApp通話先起咗殺機。
雖然Cris同Edison一口咬定，指丹尼爾強姦或企圖強姦，都被控方否定，根據負責案件嘅警官Trevisan所講，丹尼爾只係瞓喺個女人旁邊影相，後來透過WhatsApp發相畀朋友，屋內其他證人亦聽唔到35歲嘅Cris嗌救命，檢察官Salles同樣反駁強姦未遂嘅指控，話證據顯示，當時大家都有醉意，主犯老婆Cris仲可能同丹尼爾曾經調情添。
警方仲認為Edison口供有隱瞞，同佢哋掌握嘅事實不符。Edison一再否認脅迫其他人畀假口供，不過審問幾粒鐘之後，又認唔係佢自己踢開房門，係其中一個在場嘅青年喎，前言不對後語，鬼話連篇。尤其事發後兩日，尚未被捕嘅Edison，居然打電話慰問丹尼爾阿媽表示哀悼，控方認為疑犯非常冷血同有心掩飾。
佢個女Allana亦做晒嘢，明明知道事實，偏偏仲喺社交網鋪相悼念丹尼爾，而且假意問候受害者家人，畀控方形容為隱瞞犯罪嘅「幼稚手段」。
目前唯一可以肯定嘅係，丹尼爾係喺「棄屍場地」被殺而非屋內，因為控方揾到證據，檢察官Salles咁講：「嗰個人（指丹尼爾）啲血濺到周圍都係，表明佢係生勾勾去到嗰度，事關人在生時心臟會泵血，咁先會令血花四濺。」警方正等待科學鑑證結果，預計下星期中旬就可以決定用乜嘢罪名起訴有關人等。
丹尼爾前妻Bruna第一次接受採訪時，向RecordTV強調前夫並無不良嗜好，覺得單案內中有鬼，兩人育有一個兩歲女兒。
東網體育FB同你追實體壇每個精彩時刻！