史上最爆設計 利物浦紅軍變紅衞兵!

2018年11月09日 18:36
東網電視
更多新聞短片

唔少球迷都好鍾意買波衫,將愛隊着上身,行出街個人都醒神啲。香港利物浦球迷仲多咗個選擇,趁依家天氣開始凍,入定呢件靚衞衣,包保成條街嘅人都望住你,令你變成漆黑中嘅螢火蟲一樣,咁鮮明、咁出眾!紅軍本地官方購物網最近有幾件好嘢上架,其中一件灰色衞衣,印上簡體字「紅軍」二字,鮮紅色撞落灰色度勁Sharp醒。不過唔少香港利迷,似乎唔多buy呢個設計,話件衫好重中國味唔係人人都Carry到;有網友仲話着咗呢件衫,返大陸唔使攞回鄉證,仲有人話紅軍變紅衞兵添!

呢件衞衣一推出,就成為本地利迷熱門話題,喺多個香港利物浦Facebook球迷Page瘋傳。其實呢個設計唔只有簡體字,仲有繁體字以供選擇,此外仲有日本同韓文畀你揀,但如果計搶眼,識揀一定揀簡體字,唔係不如買番大大隻利物鳥嘅款式啦。

東網體育FB同你追實體壇每個精彩時刻!
http://bit.ly/2ecTF2A