【堅痛】足踝扭到90度！韋碧克勢長抖
阿仙奴今晨(周五)歐霸盃主場0比0悶和士砵亭，雖然提前鎖定晉級資格，不過韋碧克上半場恐怖受傷，就令賽事蒙上一片愁雲慘霧。
阿仙奴領隊艾美利證實韋碧克離場後被送入醫院治療，暫時未有任何檢查報告，不過根據韋碧克受傷一刻相片，呢位英格蘭國家隊前鋒右腳足踝明顯扭曲，成隻腳掌向住相反方向，企喺佢身邊嘅隊友古安杜斯目睹傷患後，亦不禁雙手抱頭，露出驚慌神情；喺韋碧克吸住氧氣被抬走嗰陣，士砵亭球星拿尼亦有上前慰問呢位昔日曼聯拍擋。估計韋碧克右腳足踝可能出現斷裂，勢必面臨極長時間休養。
現年27歲嘅韋碧克喺2014年由曼聯轉投阿仙奴，可惜期間多次受傷，包括喺2016年重傷長抖8個月，佢亦一直搶唔到正選位置，今季喺阿仙奴只係奧巴美揚同拿卡錫迪替補，主要喺盃賽輪換嗰陣擔正。
由於韋碧克同阿仙奴合約到季尾就完結，今次重傷好可能令佢面臨「失業」，至少要等佢傷愈先至有球會肯「接手」，而且豪門生涯亦好大機會玩完。韋碧克雖然唔係頂級前鋒，但佢落到場搏命踢法一向深得領隊賞識，可惜足球生涯一直受到傷患折磨，實在令人惋惜。
東網體育FB同你追實體壇每個精彩時刻！