【有片】曼迷老竇發功　6歲豆釘神救爆紅！

近期網上瘋傳一段細路哥比賽片段，片中一位6歲豆釘龍門喺對手進攻期間分心，結果企喺旁邊「督師」嘅老竇睇唔過眼，雙掌推囝囝落地救波，而且時間同力度恰到好處，造就囝囝瞓身擋出對方射門，被網民稱為史上最特別「神救」！雖然囝囝救波之後立即被對手補射失球，激到爸爸紮紮跳，但唔少球迷睇完片段都畀呢兩父子深深感動，單係twitter嘅影片點擊率已經超過400萬次，真正係紅爆全球！

影片爆紅後英國傳媒即刻起底，發現「豆釘鋼門」係效力威爾斯球會Bow Street Magpies FC嘅U6隊球員奧舒恩(Osian)，呢場波係佢第1次出任守門員，不過爸爸Phil就好認真想栽培囝囝：「場波大部份時間喺對方場區踢，奧舒恩就開始覺得悶同分心，所以我即刻叫佢集中精神，我只係幫佢一把(推囝囝救波)。」原來Phil仲係英超勁旅曼聯嘅球迷，社交網有佢同奧舒恩一齊着曼聯波衫合照，似乎佢想囝囝將來做迪基亞接班人喎！

可愛嘅奧舒恩「一救成名」，佢間球會Bow Street Magpies FC當然唔會錯失良機，英國《每日鏡報》指球會已經借呢次機會，四出搵贊助商嚟贊助球隊嘅裝備，球會主席劉易斯更表示：「呢一個係神奇撲救！我哋已經計劃簽奧舒恩入一隊，搵埋佢老竇做教練，哈哈哈！」呢段片同時引起埋威爾斯足總關注，足總發聲明提醒其他家長咪「亂入」賽事：「大家都睇到呢件事有趣一面，不過作為官方組織，我哋要確保安全比賽環境，提醒家長同觀眾都要遵守比賽規則。」

東網體育FB同你追實體壇每個精彩時刻！

http://bit.ly/2ecTF2A