難頂7號魔咒 英媒爆A山準備離開曼聯
20181110
東網電視
更多新聞短片
(Getty Images)
智利前鋒阿歷斯山齊士今年1月由阿仙奴轉投曼聯，當時球迷對佢抱極高期望，許以7號球衣，而佢自己都一心諗住創一番事業，不過大半年過去，A山表現有目共睹，中晒「7號魔咒」，近日有英媒爆料指，A山經理人開始聯絡歐洲各大球會，最快喺一月轉會窗重開離隊，目標係去巴黎聖日耳門。
A山加盟曼聯後入球量低，上陣28場只入4球，同佢喺阿仙奴及巴塞隆拿時代相比確實差天共地，佢亦繼奧雲、華倫西亞、迪馬利亞、迪比之後，第5個中曼聯7號魔咒嘅球員，着住件紅魔7號就變咗唔識踢波。
報道指，「寸王」曾喺更衣室當住全隊批評A山踢得差，令佢相當冇癮，近期安東尼馬迪爾鹹魚翻生，A山更加唔使旨意獲重用，淪為大後備，加上佢喺隊內嘅人緣普通，只同迪基亞、桑馬達同盧卡古傾得埋，落場時其實冇乜隊友交波畀佢，變得好孤立，好唔開心。
A山依家喺曼聯享有45萬鎊周薪，真係又貴又廢，如果佢搵到球會落班，相信曼聯都唔會留人，據報道佢轉會PSG有唔少障礙，其中高昂人工一定要減，否則佢好難轉會。
東網體育FB同你追實體壇每個精彩時刻！
Follow東網體育IG一齊撐本地運動員！