蜂王列奧斯爆驚人數據 多仔贏拜仁全靠佢

20181111
東網電視
更多新聞短片
(法新社圖片)
德甲國家打吡今晨上演超激烈大戰,結果主場出擊嘅多蒙特,憑住「蜂王」馬高列奧斯梅開二度,驚濤駭浪以3比2反勝宿敵拜仁慕尼黑,全取3分。贏波之後嘅多蒙特,依家以11戰得27分續居榜首,而拜仁已經畀佢哋足足拋甩7分,形勢唔對路喎!
其實今場踢得好,絕對唔止得列奧斯一個,事關拜仁就憑住首席射手羅拔利雲度夫斯基梅開二度,先後兩度領先。不過,「蜜蜂兵團」今場堅有韌力,即使馬高列奧斯先後多次失機,不過「卡士」十足嘅佢,結果一樣靠射入自己搏到嘅12碼,以及射入一球靚「窩利」成功「補鑊」,幫多蒙特追和2比2,然後再憑柏高艾卡沙喺73分鐘單刀入波,正式鎖定勝局贏3比2。
講番馬高列奧斯,今場佢獲得著名網站Whoscored評9.2分,即係讚佢演出近乎完美。仲有,列奧斯今場合共6次射門就有3次中龍,全場梅開二度兼有3次突破過人,堅犀利呀!事實上,今季遠離傷患嘅列奧斯,終於尋回狀態,家陣多蒙特喺德甲踢咗11輪,佢場場踢正選,仲射入8球,另加6次助攻。換句話講,多蒙特至今11場轟入33球,而馬高列奧斯就直接製造當中14球,佔球隊入波比率達到42%,超勁呀!
支持本地運動員,一齊去「睇體」!