【愛的剖白】有片！莫雷拉：為太太我放棄追夢

超級人氣騎師莫雷拉，事別香港馬迷數月後，即將再以蔡廐主帥身分重返本地，此舉當然令不少人感到意外，亦有唔少馬迷覺得佢當初高調赴日現時又反口，畢竟雷神曾經講過佢嘅夢想係去日本策騎，依家佢決定放棄追夢重返香港，究竟係咩原因呢？

據莫雷拉親自剖白，佢今次返嚟香港發展，係因為一個愛字，就係佢對太太Taciana同埋家人嘅愛。雷神話佢家人一直好支持佢去日本追夢，但當日本中央競馬會的騎師第一階段考試公布之前，佢已經向太太承諾，萬一考驗肥佬，就由太太決定下一步點行，同埋去咩地方發展，而太太早係考試前早已講過想返回香港，因為佢哋一家人喺香港有過一段美好時光。既然依家考試失敗，雷神覺得只要家人快樂，佢就一樣咁開心，咁點解唔嘗試返回香港呢？

如此同時，同雷神合作無間的十屆香港冠軍練馬師蔡神仙，亦曾經同佢通電並講：「We can't replace you João」(我哋無人可以取代你)。雷神話當時聽到蔡約翰講句咁嘅嘢，真係非常感動，所以佢都冇諗咁多，亦相信佢可以同蔡約翰合作攞到好成績。

不過雷神再被問到，日後會否再去日本考試，莫雷拉話好多人想佢答yes or no，佢話既然已決定返回香港，當然願意留低繼續發展。不過，雷神亦話或者有一日，佢會再嘗試去日本考驗，因為佢從來都係never say never。