【人物誌】堂安律「瀕危」　等曼城拯救！

曼城、多蒙特計劃動用千萬重金爭奪日本「少數民族」國腳中場堂安律，「拯救」呢個瀕危姓氏。

「堂安」呢個姓氏好少有，姓氏名冊可以揾到嘅同姓名人就只得堂安律一個，主要集中喺兵庫縣、大阪府，佢亦正正係兵庫縣尼崎市人，據統計全日本僅得130人，真係如果唔去開枝散葉嘅話，確實會面臨滅絕，同本名係蓼丸綾嘅女明星綾瀨遙一樣，屬於日本姓氏中嘅「少數民族」。正因為係個不尋常嘅稀有姓氏，堂安律曾經被人懷疑係韓國人。

堂安律嚟自一個五口之家，其中一個哥哥堂安憂都係球員，踢緊日職丙AC長野帕塞羅。20歲嘅堂安律技術細膩、速度快，所以呢個左腳仔外號極多，包括「馬拉當安」、「大阪至寶」、「浪花美斯」等，公認係中田英壽、中村俊輔、本田圭佑嘅繼承者，日本新一代中場大腦。出身大阪飛腳嘅堂安律，2017年6月23日外借荷甲格羅寧根，全季表現出眾，今夏正式以170萬歐元（約1,515萬港元）賣斷畀格羅寧根，最近仲畀《法國足球》雜誌列為2018年度「高柏獎」（21歲以下球員）候選人之一。

曼城主帥哥迪奧拿非常欣賞今年榮升大國腳嘅堂安律，形容係「非常精彩嘅球員」，傳聞有意喺冬季市場出價560萬歐元（約4,993萬港元）收購。其實今夏俄超莫斯科中央陸軍提出過用200萬歐元（約1,783萬港元）羅致，畀格羅寧根一口拒絕。梗係啦出手咁低，呢個細路奇貨可居吖嘛。依家德甲多蒙特又前後3次派球探觀察，擺明有心簽佢，轉會身價一定唔會平，有消息估堂安律嘅年薪，今年內會上到2億日圓（約1,390萬港元）。

日本罕有姓氏及代表人物

堂安：球星堂安律為代表，全日本約130人。

道重：早安少女組第六期成員、偶像歌手道重沙由美，全日本只有100人姓道重。

本仮屋：女優本仮屋唯香，本仮屋姓氏分布喺鹿兒島，全國約得100人。

蓮佛：女優蓮佛美沙子，全日本只有19戶約共100人姓蓮佛。

夏燒：PINK CRES隊長、女歌手夏燒雅，夏燒此姓全日約只得20人左右。

貫地谷：女優貫地谷詩穗梨，據講貫地谷一姓起源於廣島縣西部，全國約只有10人。

蓼丸：代表人物係女優、歌手綾瀨遙，佢本名係蓼丸綾，全日約得10人。

鰻：諧星鰻和宏，全國只有7人。

東網體育FB同你追實體壇每個精彩時刻！

http://bit.ly/2ecTF2A　

支持本地運動員，一齊去「睇體」！