總結:勇士分裂!杜蘭特被問候想去湖人
20181114
東網電視
更多新聞短片
杜蘭特被積蒙格連不斷用粗口問候。(互聯網)
勇士喺NBA主場以110:103擊敗鷹隊,弊在積蒙格連上場同杜蘭特吵大鑊,據講佢喺更衣室連環講粗口鬧人,而且有唇語專家發現,杜蘭特喺比賽中講咗句「呢個就係我要走原因」,疑似不爽決定咗要去湖人!
雖然史堤芬居里因傷繼續缺陣,積蒙格連被罰內部停賽1場,同埋冇咗1場比賽12萬美元波糧,但杜蘭特有29分、6個籃板同3次助攻,奇利湯臣有24分、5個籃板同4次助攻,協助勇士重響勝鼓,表面睇未有被分裂事年拖死崩潰。
只不過,勇士上場喺加時後不敵快艇,積蒙格連喺第4節結束前選擇自己組織進攻,最後失誤收場,引發得唔到單打機會進行絕殺嘅杜蘭特同佢對罵,當時佢哋喺電視鏡頭前互噴,破壞晒勇士強調團結嘅形象,佢兩個返到更衣室仲繼續鬧添!
報道話積蒙格連多次用侮辱性粗口鬧人,又提到杜蘭特可以喺出年夏天,跳出合同成為自由球員,疑似不滿對方放風想去湖人同勒邦占士聯手,需要奇利湯臣勸交,弊在有唇語專家踢爆,杜蘭特喺鬧交後講咗句That why I’m out,似乎決定咗離隊喇!
同日,火箭作客以109:99擊敗金塊,占士夏登取得22分、5個籃板同11次助攻,基斯保羅有21分、5個籃板同4次助攻,今季個人首次連續2場得分20+,協助火箭升空2連勝,即使被捲入轉會傳聞嘅安東尼繼續缺陣,都冇受影響,相反睇落打得更好。
最新賽果(左方主場)
騎士 113:89 黃蜂
金塊 99:109 火箭
勇士 110:103 鷹隊
支持本地運動員,一齊去「睇體」!
東網體育FB同你追實體壇每個精彩時刻!