私怨！高普為乜拒簽奧士文尼迪比利？
20181115
東網電視
更多新聞短片
法國天才前鋒奧士文尼迪比利，近期喺巴塞隆拿再爆紀律問題，盛傳將會被巴塞隆拿掛牌兜售，有英國傳媒更爆料，話利物浦打算出動破球會紀錄嘅8,500萬英鎊，將奧士文尼迪比利收歸旗下，同穆罕默德沙拿組成「地上最強」進攻組合！
不過，英國《每日鏡報》分析指，利物浦領隊高普反對用重用簽入奧士文尼迪比利，因為佢覺得穆罕默德沙拿、沙迪奧文尼同羅拔圖法明奴呢個正選組合「夠殺有餘」，加上史杜列治同梳頓沙基利做後備亦表現出色，而且高普準備力捧嘅18歲射手比斯達亦會喺1月傷愈復出，所以唔需要再買人。
利物浦前線人才濟濟，但係有網民就翻舊帳，指高普拒簽奧士文尼迪比利最大原因，係該法國新星曾經「搗亂」高普屋企！話說德國《圖片報》前年曾爆料，指奧士文尼迪比利效力多蒙特嗰陣，正係租住前多蒙特教練高普嘅大屋，最慘係當迪比利「玩失蹤」逼球會賣佢去巴塞隆拿後，竟然將高普間屋搞到亂七八糟，一袋二袋垃圾擺滿屋內屋外，十足十垃圾崗一樣，激到高普紮紮跳！好多利迷都認為，高普唔簽佢係廢事捉隻老鼠入米缸！
東網體育FB同你追實體壇每個精彩時刻！
支持本地運動員，一齊去「睇體」！