總結：歷史第5位！大帝又準備1個救全家
20181115
東網電視
更多新聞短片
勒邦占士暫時失去陣中最幫到手嘅隊友朗度(圓圖)。(互聯網)
湖人喺NBA主場以126:117擊敗拓荒者，完成4連勝，勒邦占士瘋狂攻入44分，超越張伯倫進佔聯盟歷史得分榜第5位，不過朗度喺比賽中受傷，估計要休息幾個星期，嚟緊大帝又要開動1個救全家模式！
經過第1節落後，勒邦占士喺第2節接連射入3分反擊，最後佢有44分、10個籃板同9次助攻，帶領湖人將戰績改寫為8勝6負，而且佢嘅得分累積至31,425分，超越張伯倫進佔聯盟歷史得分榜第5位，僅次於渣巴、馬龍、高比拜仁同米高佐敦。
假如勒邦占士往後平均每場拎25分，35場之內就可以超越米高佐敦嘅32,292分，躋身歷史第4位，意味好大機會喺今季壓過波神。可惜嘅係，朗度喺第4節搶波導致手掌骨折，預料缺陣幾個星期，意味大帝會有一段時間，失去陣中最幫到手嘅隊友。
同日，76人作客以106:111不敵魔術，占美畢拿轉會後首次上陣得14分、4個籃板同2次助攻，即使艾賓特有19分、13個籃板同10次助攻，個人職業生涯首次3雙，最後76人依然喺第4節最多領先16分嘅情況下，離奇被逆轉輸波。
最新賽果(左方主場)
魔術 111:106 76人
巫師 119:95 騎士
塞爾特人111:82 公牛
籃網 107:120 熱火
速龍 104:106 活塞
公鹿 113:116 灰熊
木狼 107:100 塘鵝
雷霆 128:103 紐約人
獨行俠 118:68 爵士
太陽 116:96 馬刺
湖人 126:117 拓荒者
支持本地運動員，一齊去「睇體」！
東網體育FB同你追實體壇每個精彩時刻！