【告別三獅】朗尼史上最佳？又有人鬧喇
20181115
東網電視
更多新聞短片
網民認為朗尼唔夠舒利亞出色。(Getty Images)
英格蘭喺熱身賽對美國，重召朗尼踢國家隊告別賽，原本已經有唔少爭議，點知英格蘭領隊修夫基又好心做壞事，佢同記者講，覺得月巴係英格蘭史上最佳射手，結果又有人鬧喇！
修夫基咁講：「我唔係話要忽視林柏特、碧咸、舒寧咸同舒利亞，但對我嚟講，加斯居尼、史高斯同朗尼對國家隊嘅貢獻多些少，而佢哋當中，我最推崇朗尼，能夠上陣多過卜比查爾頓爵士，同時入球多過連尼加，的確好難得。」
朗尼為國家隊上陣119次攻入53球，但英國《太陽報》嘅英格蘭史上最佳射手調查，29%球迷揀舒利亞，22%球迷撐卜比查爾頓，只得20%球迷選擇朗尼，搞到又有人話月巴未夠班，原因可能係佢大賽入球數字低，仲喺06年同10年連續兩屆世盃食白果啦！
支持本地運動員，一齊去「睇體」！
東網體育FB同你追實體壇每個精彩時刻！