文迪又做膝頭手術！曼城黑仔王搞笑面對
20181115
東網電視
更多新聞短片
（互聯網）
曼城法國左閘班捷文文迪，上季以天價轉投由摩納哥轉投藍月亮，點知因右膝十字韌帶斷裂要做手術，搞到上季抖多過踢。自傷愈後文迪成球隊必然正選，剛於曼市打吡亦踢足90分鐘，但原來佢傷埋左膝半月板又要做手術，勢必面臨長抖。雖然黑仔王上身，不過一向風趣幽默嘅佢選擇樂觀面對，今次手術成功之後，以搞笑方式上網報平安，藍月亮球迷都唔知好嬲定好笑。
剛入選法國國家隊大軍嘅文迪，原來已經退隊並於巴塞隆拿接受手術，佢之後於IG話畀球迷聽手術非常成功：「我另一邊膝頭在妒忌！不過手術非常成功，依家已經冇事。我好快就會回歸，大家只要喺FPL（英超Fantasy遊戲）揀另一位隊長就得喇。」佢之後仲Upload另一張相，入面佢拎住電話笑到四萬咁口，寫道：「當你做完手術之後立即收到裸照」認真搞笑。
上次動手術，文迪由上年9月抖到今年4月先復出，希望佢今次唔使養傷咁耐；於呢段時間，領隊哥迪奧拿將會搵戴爾夫、辛真高或丹尼路雷斯頂替左閘位置。
東網體育FB同你追實體壇每個精彩時刻！
支持本地運動員，一齊去「睇體」！